Ikhtiyar Novel By S Merwa Mirza Complete Novel

“آہاں ،تو جانے کی مکمل تیاری ہو گئی” مہر ہاتھوں میں کئی شاپنگ بیگز لیے لب و لہجے میں مقدور سی خلش بسائے اندر کمرے میں ہی آگئئ تھی، یوں لگ رہا تھا کہ وہ ابھی مارکٹ سے آئی تھی۔مقابل کوئی اپنی تمام تر دلکشی کے سنگ مسکرایا تھا۔ لہجے میں اک طرف اداس کر دیتی اداسی نے عود کر جتایا تو دوسری سمت وہ نیلی آنکھیں فورا سے بیشتر مسکراہٹ معدوم بھی کر گئیں۔ “یس ایٹ لاسٹ، تم لوگوں کی ‘مینال’ نامی بلا سے جان چھوٹنے والی ہے” وہ اپنے نام کی شاید ایک ہی تھی۔ کھلکھلا کر ہنسنا تو شاید اس نے چھوڑ دیا تھا،ہر چیز میں اعتدال پسندی اپنانے والی ‘مینال مرتضی’ اب برائے نام ہنستی اور جیتی تھی۔ کمال کی ادائے بے نیازی اپنے لہجے کی سرد مہری میں چھپائے وہ ساحرانہ سے تبسم کو پھر سے اپنے ہونٹوں سے چھوئے بولی۔ “ھائے بلا مت کہو لڑکی، تم بھی ایسا جواب دیتی ہو کہ اگلا تمہیں تمہاری اہمیت بتائے بنا نہیں رہ پاتا” مہر نے اپنے مسکراتے اور شرارت سے بھرے لہجے میں کہہ کر پھر سے مقابل کو ہنسایا تھا۔ “وہ کیا ہے ناں کہ یہاں رہ کر اپنی اہمیت بار بار جاننے کی عادت سی ہو گئی ہے۔ خیر یہ سب کیا ہے میڈم، لگتا ہے میرے جانے کی خوشی میں پوری مارکٹ لوٹ لائی ہو” مینال نے مسکراتے ہوئے مہر کے ہاتھوں میں شاپنگ بیگز دیکھتے ہوئے پہلے اپنی بگھڑتی عادت کا بتایا اور پھر خاصے شریر انداز سے کہا تو اب شرارت نے ہجرت کر کے مہر کے چہرے پر براجمان ہونا پسند کیا۔ “بس ایسا ہی سمجھ لو، بہت یاد آو گی۔ ویسے فلائٹ کتنی دیر تک ہے تمہاری؟” مہر شاپنگ بیگز سے چیزیں نکال کر اسکے سوٹ کیس میں ڈالتے ہوئے آنکھوں میں نثار ہوتی چاہ لیے بولی تھی، لہجے میں اک خلش اور اداسی بھی عود آئی۔ “دو گھنٹے تک” مہر نے محسوس کیا کہ مینال اداس سی ہو گئی تھی۔ شاید یہ ہجرت چیز ہی ایسی ہے، من پسند ہو یا ناپسند، اسکے باعث دل کا رنجیدہ ہونا فطری تھا۔ “اداسی کس لیے میری جان” مہر اسکے چہرے کے ساتھ اپنی ہتھیلی لگائے اسے اپنے روبرو کر چکی تھی، بے حد چاہ میں لپٹے وہ اسکی بجھی صورت پر نگاہیں جمائے ملائم پن سے بولی۔ “پتا نہیں مہر یہ کیسا احساس ہے جو مجھے اداس کر رہا ہے۔ پانچ سال میں تم لوگوں کے ساتھ رہی ہوں اور سچ پوچھو تو مجھے عادت سی ہو گئی ہے۔ یہاں سب چھوڑ کر واپس اپنی الجھنوں میں لوٹ جانا اب مشکل لگ رہا ہے”