Allah ke waste By Umaima Shafeeq Qureshi Urdu Romantic Novel

“میں نے ساری زندگی تیری عبادت کی۔۔۔ کیونکہ میری ماں نے کہا تھا،میں نے تیرے لیے روزے رکھے۔۔۔کیونکہ ایسا کرنے کے لیے میری ماں نے کہا تھا،میں نے تیرے لیے صدقے دیے۔۔۔یہ بھی میری ماں نے کہا تھا۔لیکن آج میری ماں ختم۔۔۔ تو سب ختم۔۔۔!”صبح صبح کا وقت ہونے کی وجہ سے تقریبا سڑک خالی تھی،وہاں اکادکا گاڑیاں موجود تھیں،کسی کی بھی نظر شایان پر نہیں پڑی تھی،اور اگر کویٔ دیکھ بھی لیتا تو بھی اسے پاگل ہی سمجھتا۔ شایان نے پاگلوں کی طرح سڑک کے کنارے پڑے کچھ پتھر اکھٹے کرنے شروع کر دیٔے،پتھر اکھٹے کرنے کے بعد اس نے ایک بار پھر آسمان کی طرف دیکھا۔ “میری ماں ختم تو سب ختم۔۔۔!”شایان نے ایک پتھر پوری قوت سے آسمان کی طرف اچھالا تھا۔ “آج کے بعد میں تجھے کبھی سجدہ نہیں کروں گا۔!”شایان نے چیختے ہوۓ ایک اور پتھر آسمان کی طرف اچھالا تھا۔ “سن رہا ہے نا تو۔۔۔!” “سن لے۔۔۔آج کے بعد میرا تجھ سے کویٔ واسطہ نہیں۔۔۔!”اب وہ پاگلوں کی طرح آسمان پر پتھر برسا رہا تھا،ایک پتھر واپس آ کر اس کے ماتھے پر لگا تھا،اس کے ماتھے سے خون رسنے لگا تھا،مگر وہ ہر چیز سے بے نیاز مسلسل پتھر برسا رہا تھا۔ “آج کے بعد شایان میر کا اللہ سے کویٔ واسطہ نہیں۔۔۔!”وہ پوری قوت کے ساتھ ایک بار پھر چیخا تھا۔